ليت الشوارع تجمع اثنين صدفه ;

يطيح جفن الليـل واهـز كتفـه
نجم يفز، وباقي الليـل مطفـي

واحاكي الجدران عن مثل غرفـه
ماتشبه الجدارن ويطول وصفـي

وتثاوب الجدارن واظهر لشرفـه
تحت السماء واسكر الباب خلفـي

ليت الشوارع تجمع اثنين صدفه
لا صار شباك المواعيد مجفـي

ريحٍ تهب وتسكن العظـم رجفـه
وتموت ريح وتسكن اوراق نزفي

فوق الفيافي تهطل دموع وطفه
ويصب لمع بروقها وسط طرفي

ياطاري الغدران ، والعمر رشفه
مع قلّها ، ياليتها ييـوم تصفـي

الحب واجد مير الأقـدار صلفـه
والارض واجد لكن العزم منفـي

والي اعرفه راح ماني ب اعرفـه
ولااظن يذكرني اليا اقلبت مقفـي

ماهو حبيبي مورد القلـب حتفـه
ولاهو حبيبي يفرح بوقت ضعفي

مراً ثمر هالليل ، وامّـر قطفـه
يالحنظل الي صرت اذوقه بكفي

هذا وتّو الليـل مـاراح نصفـه
ياليل بعض اللي مضى منك يكفي